A sexta edición dos Premios
D.O. Ribeiro celebrarase o 20 de xuño no Mosteiro de San Clodio (Leiro,
Ourense), onde se reunirán máis de 250 profesionais do sector vinícola e
a divulgación
O Mosteiro de San Clodio, en Leiro (Ourense), recibirá o
martes 20 de xuño ás 19.00 horas aos premiados e convidados da sexta edición dos Premios da Denominación de Orixe Ribeiro.
O Consello Regulador da D.O. máis antiga de Galicia é o organizador
desta cita que quere celebrar o bo traballo dos profesionais e divulgar a
calidade dos seus viños.
Nela congregaranse máis de 250 profesionais adegueiros, colleiteiros,
distribuidores, almacenistas, xornalistas divulgadores ou prescriptores.
O Consello homenaxea, nas súas categorías honoríficas, a traxectoria salientable de varias personalidades.
A Master of Wine, xornalista e escritora británica,
Sarah Jane Evans MW é o novo premio “Persoeiro de Honra”; o xornalista catalán
Joan Gómez Pallarés, o “Premio á Mellor Tarefa de Comunicación”; a sumiller galega radicada en Madrid
Mónica Fernández acada o galardón “Muller e Viño”; e
Arsenio Paz, responsable da adega Vilerma, recibirá o “Premio Vida entre Vides”.
Tamén se conceden galardóns en tres categorías dedicadas aos
profesionais das viñotecas e locais de restauración e hostalería,
outorgados directamente polas adegas adscritas á Denominación.
Na categoría de “Mellor Tenda Especializada - Viñoteca” son candidatos:
Casa Amador (Ferrol),
El Yate (Vigo) e
La Sucursal (Lugo).
Na categoría de “Mellor taberna – Bar de Viños”, os aspirantes son:
Mesón Picasso (Ferrol),
Casa de vinos Montecarlo (A Coruña) e
Bagos (Pontevedra).
Por último, na categoría de “Mellor Servizo de Viño en Restaurante”, os finalistas son:
O Retiro da Costiña (Santa Comba),
A Mundiña (A Coruña) e
O Barazal (Maside).
Ademais, durante o evento desvelaranse os gañadores das categorías:
“Mellor viño branco adega”; “Mellor viño branco colleiteiro”; e “Mellor
viño tinto”.
Perfís dos gañadores
Sarah Jane Evans, Master of Wine, é unha escritora de
viños galardoada, especialista en viños e gastronomía de España. Foi
xornalista, editora de revista, escritora de libros e traballou en
televisión e radio. É co presidenta dos Decanter World Wine Awards, o
concurso de viños máis grande no mundo.
Evans sucede no galardón Persoeiro de Honra ao xornalista Cristino
Álvarez, gañador en 2016; en 2015, foi recollido polos restaurantes e
cociñeiros galegos con Estrela Michelin e na edición 2014 recoñeceu ao
sumiller Josep Roca (El Celler de Can Roca).
Joan Gómez Pallarés é o responsable do blog
De vinis, ademais de colaborador de
El País Semanal. Na súa longa andaina implicouse en numerosas iniciativas e medios, como a Bullipedia,
Cutpages ou
El Periódico de Catalunya.
No 2016 o Premio “Mellor Tarefa de Comunicación” foi para Salvador Manjón, director de
La Semana Vitivinícola.
Mónica Fernández, nada en Quiroga (Lugo), é a directora
de sala e sumiller dos restaurantes do Grupo Bambú. Recibiu o Prix au
Sommelier (Premio ao Sumiller) outorgado pola Academia Internacional de
Gastronomía no 2017 e o Premio Nacional de Gastronomía 2015 á mellor
directora de sala.
Mayte Santa Cecilia, directora de Marketing e de compras das tendas
Bodega Santa Cecilia, recolleu o Premio “Muller e Viño” en 2016.
Arsenio Paz adquiriu xunto a Chon Labrador o lugar de A
Vilerma no 1977 e quixo comezar a facer viño para os seus amigos.
Apostou por recuperar as variedades tradicionais e, aos poucos, lanzouse
á explotación profesional do viñedo e contribuíu á revalorización e
modernización dos viños do Ribeiro. No 1987 saíron ao mercado as
botellas de Vilerma, branco e tinto.
No 2016, o Premio “Vida entre Vides” homenaxeou a Avelino Lorenzo.
Sobre a Denominación de Orixe Ribeiro
A Denominación de Orixe Ribeiro é a máis antiga de Galicia,
oficialmente protexida no ano 1932, e unha das máis antigas de España.
Actualmente está conformada por 115 adegas situadas nos vales formados
polos ríos Miño, Avia e Arnoia, no noroeste da provincia de Ourense.
A D.O. Ribeiro ten unha extensión de 2.332 hectáreas de vide situadas
nos concellos de Arnoia, Beade, Boborás, Carballeda de Avia, Carballiño,
Castrelo de Miño, Cenlle, Cortegada, Leiro, Ourense, Punxín, Ribadavia,
San Amaro e Toén. Un territorio de grande diversidade vitivinícola onde
traballan uns 5.800 viticultores.
A D.O. Ribeiro produce viños brancos e tintos xenuínos con variedades
autóctonas locais: Treixadura, Loureira, Sousón, Brancellao… Así como o
Tostado do Ribeiro, un viño naturalmente doce de longa tradición na zona
que data do século XIX.
A produción da colleita 2016 na Denominación de Orixe foi de 11,6
millóns de quilos de uva. O 92% da produción total é viño branco e o 8%,
viño tinto.
Cadro de premiados e finalistas Premios D.O. Ribeiro 2017
Premio
|
Gañador
|
| Persoeiro de Honra |
Sarah Jane Evans |
| Mellor Tarefa de Comunicación |
Joan Gómez Pallarés |
| Muller e Viño |
Mónica Fernández |
| Vida entre Vides |
Arsenio Paz |
| Premio |
Finalistas
|
| Mellor Tenda Especializada –Viñoteca |
Casa Amador (Ferrol)
El Yate (Vigo)
La Sucursal (Lugo) |
| Mellor Taberna – Bar de Viños |
Mesón Picasso (Ferrol)
Casa de vinos Montecarlo (A Coruña)
Bagos (Pontevedra) |
| Mellor Taberna – Bar de Viños |
Mesón Picasso (Ferrol)
Casa de vinos Montecarlo (A Coruña)
Bagos (Pontevedra) |
| Mellor Servizo de Viño en Restaurante |
O Retiro da Costiña (Santa Comba)
A Mundiña (A Coruña)
O Barazal (Maside) |
Por determinar
“Mellor viño branco adega”, “Mellor viño branco colleiteiro” e “Mellor viño tinto.
